nach unten
nach links nach oben nach rechts

Fotosammlung

Openairbilder

Kochbuch von 1877

Energie von hier

BuiltWithNOF
Hohenloher Lyrik

Paul Rohleder

 

Der Hoheloher

 

A Schrittle hinter'm Schwowaland

fengt 's Hohelohisch ou.

A mancher Herr vom Neckarstrand

kummt sa Lebdoch net nou.

 

Er maant, do gait's ner Fichs un Hosa —

derweil wächst do der beschde Wei,

un Nachdigalla härt mer bloasa

aus jedem Buusch dochaus, dochei!

 

Viel Wälder deihna se verschwiecha

in Berch un Dool, ball klaa ball groaß,

for jeden Wanderer a Vergniecha —

wer's oufengt, den läßt’s nimme loas.

 

Die Reiher streicha stolz und prächtich

als treie Wächter iwers Land

un fischa zwischanei bedächtich

am Tauwer-, Jagscht- un Kocherstrand.

 

Haalquella hat mer ba uns gwunna

seit alter Zeit in schäner Zohl.

Am schönschta isch der Weltbadbrunna

bom Ordensschlouß in Merchadohl.

 

Do kumma d' Leit aus aller Welt her

mit kranke Läwern, Darm un Meicha

un gewa gära wacker Geld her

— wenn's sei muaß aa a ganz Vermeicha! -

 

fer des guat Wasser, wu voll Salz schteckt.

Kaaf jo äh's trinkscht a Roll Papier!

's kummt vor, daß aaner glei da Hals schtreckt.

Ganz gwiiß brauchsch ball a Lokus-Diar!

 

Der Grünewald un Riemenschneider

mit da Madonna, wu ihr kennt

in Stuppach, Creichl undsoweiter —

kummt's Dogma net von ihra Hend?

 

Dia Derflich na vor alle Dinga —

do isch a jedes a Idill.

Der Geichel kräabt. Die Häahner singa.

A Huund gauzt. Sunsch isch alles schdill.

 

Halt! Naa! Do grunza a poar Seilich.

Die Seiwaad leit glei hinterm Haus.

Und d' Kerchuhr schlächt. Doch na isch freilich

der ganze Umtrieb wieder aus.

 

Naa! Horch! Do knallt im Bulldogskarra

uffs Feeld a Bauer forsch un schtark.

A Hohenloher Fleckviehfarra

koscht fünfazwanzigdauset Mark!

 

Der Lährer hockt mit siewa Kerlich

in serra Schual un schafft se wund

un seifzt un denkt: ,Heit mach e währlich

noch a poar Färiaüwerschdund!'

 

Der Pfarr sorcht for vierhundert Seela.

Er ploacht se arch und geit se Miah,

bo Doch un Nocht duat er se quäla —

doch iiwerschaffa duat er se nia.

 

So zwischa Wald und Derflich drinna

winkt manche Schdadt als herrlichs Ziel

vom Haalplatz bis zu Roathaburchs Zinna,

von Ähringa bis Dinkelsbihl.

 

Na sann doa Färschda un Barona

un königliche Edelleit

mit Perla, Edelstaa un Krona

wall alle Schdund a Schlößle leit.

 

Uff mancher Berchnoos uuvergeßlich

schdäht groaß a Burch un traamt ins Dool

mitsamt da Prinzlich un Prinzeßlich.

Sou schä isch gwiiß net iwerohl!

 

Der Adel isch sam Volk verschwoara,

gäht gära mit em nei's Café.

Doa fihlt se jedes hoachgeboara.

Des duat amm guat, was braucht mer meh?

 

Im Roasagarta Kaffee trinka

isch deswech scho a bsundre Fraad,

wall mer bo Bloame un Merinka

a noch dia herrlich Aussicht hat.

 

Bächlinge leit genau sou drunte,

d' Sunn lacht uff d' Jagscht mit sotter Ruah;

als hätt heit der Harro sa Seelchen gfunda

und nemms mit hamm uff Moarschdaa zua.

 

Was isch doa scho der Nesabach

un 's Fildersauerkraut?

Fernsehdurm, Haafa, Autokrach

un was die Schduagarter sunscht erbaut?

 

Was isch der ganze Allmachtshaufa

bo Daimler-Benz un Robert Bosch?

Vergaste Schdadtluuft miassa's schnauf a —

des mooch i net in meira Gosch.

 

Doa gait's ba uns ganz andre Diftlich,

doa riachts nach Kiah un Aachabaam

un iiwerohl sann gsunde Liftlich —

drum bin un bleiw i doa dahaam!